Kamareddy: కామారెడ్డి, జూలై 11 (ప్రజా శంఖారావం): రాజకీయ ఎదుగుదల ఓర్వలేకనే తనను తప్పుడు కేసులో ఇరికించి అక్రమ అరెస్టు చేయించారని టీపీసీసీ జనరల్ సెక్రెటరీ గడ్డం చంద్రశేఖర్ రెడ్డి అన్నారు. గురువారం బెయిల్ పై విడుదలైన తరువాత శుక్రవారం తన నివాసంలో మీడియా సమావేశం నిర్వహించారు. ఈ సందర్భంగా ఆయన అరెస్టుకు సంబంధించి పలు విషయాలు వెల్లడించారు. గత నెల 30 న తిరుపతి వెళ్లి ఈ నెల 2 న కామారెడ్డికి తిరిగి వచ్చానని అన్నారు. ఈ నెల 3 న ఒక వెంచర్లో లభించిన జిలెటన్ స్టిక్స్, డిటోనేటర్ల కేసులో పట్టణ సీఐ నరహరి తనకు రాత్రి 8 గంటల 30 నిమిషాలకు ఫోన్ చేయగా, తాను పోలీస్ స్టేషన్ కు వెళ్లాలని తెలిపారు.
పోలీస్ స్టేషన్లో తాను వెళ్లే సమయానికి ఏ ఎస్ పి చైతన్య రెడ్డి ఉన్నారని అన్నారు. ఈ కేసు విషయంపై పలు ప్రశ్నలు అడిగారని అందుకు బదులుగా తనకు ఆ వెంచర్ లో ఒక గుంట భూమి కూడా లేదని వాటికి సంబంధించిన డాక్యుమెంట్లు ఇవ్వడం జరిగిందని అన్నారు. అనంతరం రూరల్ సీఐ రామన్ పోలీస్ స్టేషన్ కి వచ్చి మీతో ఎస్పీ మాట్లాడతారని తనను ఒక ప్రైవేటు వాహనంలో ఎక్కించుకొని ఎస్పీ ఆఫీసు వైపు కాకుండా నేరుగా హైవే వైపు తీసుకెళ్లారని చెప్పారు. రాత్రి 12 గంటలకు తనను నేరుగా బాన్సువాడ ప్రాథమిక పాఠశాలకు తీసుకెళ్లి మళ్లీ అవే ప్రశ్నలు అడిగారని తెలిపారు.
సుమారు 2 గంటల సమయంలో గవర్నమెంట్ వైద్యుల ఆధ్వర్యంలో వైద్య పరీక్షలు నిర్వహించి ఉదయం 3 గంటలకు బిచ్కుంద జడ్జి వద్ద హాజరుపరిచారని 6 గంటలకు నిజామాబాద్ సబ్ జైలుకు తరలించారని తెలిపారు. ఓ మాజీ కౌన్సిలర్ తనపై సోషల్ మీడియాలో తప్పుడు దుష్ప్రచారం చేస్తున్నారని చంద్రశేఖర్ రెడ్డి తెలిపారు. తనకు టిపిసిసి జనరల్ సెక్రెటరీ పదవి వచ్చినప్పటి నుండి రాజకీయంగా జీర్ణించుకోలేక సోషల్ మీడియాలో తప్పుడు ప్రచారం చేస్తూ తన పరువు ప్రతిష్టలకు భంగం కలిగిస్తున్నారని అన్నారు. ఇలాంటి తప్పుడు ప్రచారం చేసిన వారికి సమయంలో ప్రజలే తగిన గుణపాఠం చెబుతారని అన్నారు.
పార్టీ పెద్దల దృష్టికి తీసుకెళ్ళాను
తన అక్రమ అరెస్టు వెనకాల ఒక పెద్ద మనిషి హస్తం ఉందని సంచలన విషయం బయటపెట్టారు. ఆయనతో పాటు అతని కొడుకు, తమ్ముడు, అన్న కొడుకు, అల్లుడు ఇలా అందరి వివరాలు తన వద్ద ఉన్నాయని వాటిని తమ పార్టీ హై కమాండ్ దృష్టికి తీసుకెళ్లానని తెలిపారు. సమయం వచ్చినప్పుడు అన్నీ విషయాలు ఆధారాలతో బయటపెడతానని అన్నారు. పార్టీ తన పనితీరు పట్ల సానుకూలంగా ఉన్నదని తెలిపారు. తనకు చట్టం, న్యాయం పై నమ్మకం ఉందనీ, ఈ విషయాన్ని ఐజి దృష్టికి తీసుకెళ్లి ఫిర్యాదు చేస్తామని తెలిపారు. తన అక్రమ అరెస్టు అంశంపై న్యాయపరంగా ముందుకు వెళ్తామని వివరించారు. రాబోవు స్థానిక సంస్థల ఎన్నికలలో పార్టీ గెలుపే పరమావధిగా పనిచేస్తామని అన్నారు.
